Heb 3 | DAD | STEP | Anĩ nigin, fateul turau tar, ãg Negurem iweignein, Jesus ĩ yogo aposel ado pris mudur, are ada ĩ nigin momoi tauf taudig, ĩ bun kisi fatuk tanouf.

Hebrews 3

Jesus Ĩ Moses Wal Fiya

1 Anĩ nigin, fateul turau tar, ãg Negurem iweignein, Jesus ĩ yogo aposel ado pris mudur, are ada ĩ nigin momoi tauf taudig, ĩ bun kisi fatuk tanouf. 2 Moses ĩ Negur nẽ fõ ganan bun, Negur nẽ od el fe dõ fedig, age fiya bagai, Jesus ĩ, Negur ĩ igirnen anĩ ait el fe dõ fedig. 3 Fõ inoya tamo yogo yana odug yaledig, fõ anĩ wal fiya. Age fiya bagai, Jesus ĩ yana odug bagai, Moses wal fiya. 4 Fõ ganan fõ inoya tamo ado, anĩ ere, Negur ĩ yogo ereb ereb ganan inoya marau. 5 Moses ĩ, Negur nẽ fõ ganan bun kabĩ tamo ibod ken, Negur nẽ od el fe dõ fedig, agef fen, ĩ Negur dumen bun ereb wogõ youf anĩ kurõ fesin. 6 Anĩ ere, Kristus ĩ Negur Naal, ĩ Negur ait el fe dõf fen, Negur nẽ fõ lo fedig. Anĩ nigin, ada toku totol tano fen, wauda isef anĩ nigin yanada talesef anĩ tarou tokõ tafalauf are, ada yogon fõ.

Momoiya Sã Nigin Weder Irouya

7 Anĩ nigin, Awa Uur Fateul eig ye irok kilei ago gouf:

“Gama ã, Negur nẽ ait karĩ gouf are,
8 ã oun gerere tuan Negur kisi wiyẽg fen,
kiwai wenẽgen age fiya gen,
ã wauĩ to agef totolouf.
9 An temeĩ tar aya kisi difiya fen, kiwai difanan,
are idi yar foti bun ereb age afen are dilen.
10 Anĩ nigin, aya ibor anidi nigin seye ise fen,
oron, ‘Idi neid waud faimud itorna fen, fire iledig,
age de fen, idi neu naab to keleĩdig.’
11 Anĩ nigin, aya seye ise fen, wau kuturol fen, oron,
‘Idi neu si inoya bun to bagai dilauf.’” ^{▼▼3:11Sam 95:7-11}
12 Turau tar, ã takam, wau sane ado momoiya sã anim, mata ibodõya Negur dudum fiyẽf anĩ to ago gouf nigin lo welegei. 13 Anĩ ere, od ‘Gama’ yeya Negur nẽ Itotoya bun yenek anĩ, ada bun fau agef yenẽf are, naa ganan bun abob wau talesagauf, anĩ bunem, ã taka mosorem idegnẽ di, wau to totolouf. 14 Uruwa bun ada kisi totol adon anĩ, kafĩ tafel tarou, idikeleya bun talauf are, ada Kristus nẽ ereb ereb ganan weim talef. 15 Negur nẽ Itotoya eig ye irok kilei,

“Gama ã Negur nẽ ait karĩ gouf are,
ãgenei tubuĩ tar Negur kiwai difenen age fiya gen,
ã wauĩ to agef totolouf.” ^{▼▼3:15Sam 95:7, 8}
16 Are aiyaim karĩ de fen, kiwai dinon? Idi ganan Mosesem Isip tamal guri feid dilen anidim sã de? 17 Negur aiyai nigin yar foti wau sanen? Idi mosor dino fen, gerere tuan gare den anidi nigin sã de? 18 Negur aiyai nigin wau kuturol fen, idi yogon si inoya bun to bagai dilauf yen? Idi yogon od to dõ difen anidi nigin sã de? 19 Anĩ nigin, ada tailef, are idi to momoi den nigin, namen ileya kisi feleya san.